【轮证赢家】落场不了...放大图片

噚日朝早拣咗两只恒指牛出嚟,分别係(55234)同(55317),基于个市喺噚日上半场无啦啦弹升逾400点,搞到(55234)同(55317)由贴价都变得唔贴价。

上半场见住咁升法,硬追唔係唔得嘅,但点都想等个靓少少嘅位先落场。拆开恒指5分钟图见最似样可以落到场嘅位就係下昼2点45分至2点55分,呢度时间5分钟图上有见过SlowSTC(14,3)落到超卖位,大约落到2X呢啲位到啦,而同步(55234)同(55317)高低位分别做过$0.066/$0.061同埋$0.086/$0.081,平均买入价就係$0.0635同$0.0835。

咩位走?梗係再等恒指5分钟图SlowSTC(14,3)由低位上返去超买位啦,其实讲紧临收市前5分钟,恒指5分钟图SlowSTC(14,3)真係上到超买呢个位,呢段时间我噚日就係同我老友吴家顺吹紧水,喺临收市前三分钟佢同我讲「喂,再倾,平咗仓先」,收咗线之后其实我都拿拿声走货先,一来大家都知我唔多锺意坐货过夜,二来其实我都差啲醒唔起,挂住同佢倾喺我呢度开专栏一事。依家谂返...临收市前三分钟...唔通同佢个「吴系仨分钟」有关?我估啫。

今朝未起身已经收到message话特朗普押后啲关税,再加埋噚日港交所(00388)提出同伦交所合併,作价有22%溢价,今朝恒指高开124点,报27283点,不过依家10点22分见恒指高开低收,倒跌147点,做紧27011点,日线图上见今日恒指粒阴烛企喺条50天线26997点)之上,换条保历加通道出嚟睇嘅话,今日叫做第二日踩住条保历加通道顶(27166点),而整条保历加通道形态就仍然向上。

睇埋恒指牛熊证街货图,上方熊证第一层27100至27199点今日一开市就全数被杀清,呢七友就只有116张期指,比噚日少咗387张,同噚日预计呢一层街货会四散嘅一样。咁走去边?牛证同熊证都各有新增期指张数,而上方熊证重货区退守到27600至27699点,呢度有相当于938张期指,至于下方牛证重货就係25800至25899点,有相当于644张期指,而呢一层係第八贴价街货层,「点解退到咁后嘅?」唔係,只係有七层新层街货层面世啫,最贴价牛证已经拉到上26500至26599点,呢度有相当于592张期指,绝不失礼。

依家10点33分,见恒指仍然企喺27000点楼上,同上方熊证係比较贴价,之但係担心嘅就係日线图上SlowSTC(14,3)确係有严重超买準备下行嘅迹象,係无咩心水嘅时候,我个Whatsapp係咁弹啲message出嚟,原来工作上嘅朋友、vendor已经陆陆续续收到我寄出去今年嘅中秋礼盒:兔兔灯笼同手工曲奇,又係时候要同佢哋联谊一番,今朝个市都係...不了...

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:[email protected];FB:轮证赢家

相关推荐